“Wauzaji wa maji kigamboni msibeze juhudi zinazofanywa na serikali kuleta maji ya uhakika Kigamboni"

Posted on: February 14th, 2021

Ni kauli ya makamu wa Rais Mhe. Samia Hassan Suluhu alipokuwa akizungumza na wananchi leo mara baada ya kukagua maendeleo ya ujenzi wa tanki la maji  linalojengwa Kisarawe II   Wilayani Kigamboni linalohusisha visima 12 na uwezo wa  kuhifadhi maji lita milioni 15 linalojengwa  kwa kutumia fedha za ndani za DAWASA kiasi cha Bilioni 23.

Makamu wa Rais amesema kuwa Serikali imejitoa kutatua changamoto ya upatikanaji wa maji  kwa kutumia gharama kubwa  kujenga miundombinu ya maji ili kustawisha afya na maendeleo ya wananchi, Hivyo wananchi wa Kigamboni wanapaswa kuilinda miundombinu hiyo wakati wa utekelezaji wa mradi na hata baada ya kukamilika ili lengo lililokusudiwa liweze kukamilika.

“ Wapo wananchi ambao walichimba visima vya maji na kusambaza kwa wananchi wengine kwa lengo la kuuza , Serikali inapoleta maji ya gharama nafuu wauza maji hao wanabeza ,hii haipendezi  naomba wauza maji msituharibie Siasa nguvu iliyoweka Serikali kutatua changamoto ya maji ni kubwa”

Ameongeza kwa kuwataka Watendaji wa Mitaa kuunda kamati za maji zitakazokuwa na jukumu la kulinda miundombinu ya maji iliyopo katika maeneo yao ikiwa ni pamoja na kusimamia changamoto ya kubambikiwa kwa gharama za bili ya maji wanazopata wananchi kutoka DAWASA.

Mhe. Samia amesema kuwa anaimani hadi kufikia Desemba tatizo la maji Dar es Salaam litakuwa limekwisha nakuwataka Wizara ya Maji kumaliza tatizo la maji  kwa kukamilisha miradi inayojengwa nchi nzima isiwe kwa Dar es Salaam pekee ili lengo la Serikali la hadi kufikia 2025 utatuzi wa changamoto ya upatikanaji wa maji nchini liwe limekamilika.

Aidha Mhe. Samia ameitaka kampuni inayotekeleza ujenzi wa mradi wa maji Kisarawe II  Advent Construction Limited kukamilisha  mradi kwa wakati na kwa viwango  vinavyoptakiwa ili wananchi waweze kunufaika na mradi huo .

Mradi wa ujenzi wa Tanki la maji linalojengwa kisarawe II unatarajiwa kumalizika November na unahusisha visima 12 ambapo hadi sasa visima 7 tayari vinafanya kazi

Ujenzi wa tanki la maji ukiwa katika hatua za awali

Mkurugenzi Mkuu wa DAWASA Cpriyan Luhimija akielezea namna mradi huo utakavyonufaisha wakakzi wa kigamboni na maeneo ya Jirani kama Kongoe na Mbagala kwa Makamu wa Rais.

Mkurugenzi Mkuu wa DAWASA Cpriyan Luhimija akitolea ufafanuzi hatua ya ujenzi wa tanki hilo na namna walivyojipanga kulikamilisha kwa wakati.

Makamu wa Rais Mhe.Samia Suluhu akiwa anazungumza na Waizri wa Maji Juma Aweso mara baada ya kukagua mradi

Mkuu wa Wilaya ya Kigamboni Mhe.Sara Msafiri akizungumzia kwa uchache namna Wilaya ilivyo na matarajio na mradi huo na utakavyonufaisha wakazi wa Kigamboni.

Mkurugenzi Mkuu wa DAWASA Cpriyan Luhimija akitolea ufafanuzi jinsi DAWASA ilivyojipanga kutatua changamoto ya upatikanaji wa maji  Kigamboni na  Dar es Salaam kwa ujumla.

Makamu wa Rais na Viongozi wengine wakiendelea kupokea ufafanuzi jinsi DAWASA ilivyojipanga kutatua changamoto ya upatikanaji wa maji Dar es Salaam.