WATENDAJI KIGAMBONI WATAKIWA KUWASHIRIKISHA WANANCHI UTEKELEZAJI WA MIRADI YA MAENDELEO

Posted on: September 8th, 2025

Mkuu wa Wilaya ya Kigamboni, Mhe. @dalmiamikaya amewataka watendaji na Wenyeviti wa Serikali za Mitaa  ndani ya Manispaa ya Kigamboni kuwashirikisha na kutoa elimu kwa wananchi juu ya utekelezaji wa miradi ya maendeleo katika maeneo yao ili waweze kupata uelewa.

DC Mikaya ametoa agizo hilo leo, Agosti 8. 2025 wakati wa ziara yake ya kutembelea na kukagua miundombinu ya barabara katika Kata ya Mjimwema na Kibada aliyoifanya kwa lengo la kujionea hali ya utekelezaji wa miundombinu hiyo.

"Jukumu la viongozi wa Mitaa na Kata ni kutoa elimu na taarifa sahihi ili wananchi washiriki ipasavyo kwenye maendeleo ya Mitaa yao." Alisema DC Mikaya.

Aidha, ameiagiza Wakala wa Barabara Mjini na Vijijini (TARURA) kutengeneza barabara za dharura zitakazowawezesha wananchi kupita wakati ujenzi na ukararabati unaendelea.

Pia ameiagiza wakala huo kuhakikisha wanawasimamia wakandarasi wote wanaojenga barabara ndani ya Wilaya ya Kigamboni na kuhakikisha wanakuwepo kwenye eneo la Mradi wakati wote  ili kuongeza kasi ya ujenzi wa miundombinu hiyo