Watumishi wa Idara ya Ardhi Manispaa ya Kigamboni watakiwa kuepuka kutoa majibu mepesi wakati wa kutatua kero za Wananchi

Posted on: February 12th, 2022

Mkurugenzi wa Manispaa ya Kigamboni Ndugu Erasto Kiwale amewataka wataalamu wa Idara ya Ardhi Manispaa ya Kigamboni kuepuka kutoa majibu mepesi wakati wa kutatua kero za Wananchi haswa zinazohusu migogoro ya Ardhi.

Ndugu, Kiwale ametoa wito huo asubuhi ya leo tarehe 12/02/2022 wakati akifungua zoezi la kusikiliza na kutatua kero zinazohusu urasmishaji lililofanyika Ofisi ya Kata ya Mjimwema  ambapo Wananchi wa mtaa wa Mjimwema, Magogoni, Ungindoni pamoja na Maweni walipata fursa ya kuwasilisha kero zao.

Aidha akitilia msisitizo amezitaka Kampuni binafsi zinazofanya urasimishaji kuweka wazi mikataba yao kwa Wananchi pamoja na kuepuka chelewesha mchakato mzima wa urasimishaji ili kupunguza malalamiko.

Sambamba na hilo Mratibu wa Urasimishaji Mkoa wa Dar es Salaam Ndugu Laulent Luswani ameeleza kuwa wameandaa utaratibu wa kuzunguka kila Wilaya kwa lengo la  kutatua Kero zinazohusu urasmishaji kwa Mkoa wa Dar es Salaam

Akifunga zoezi la kusikiliza kero Kamishna Msaidizi wa Ardhi kanda ya Dar es Salaam  Ndugu Idrisa Kayela pia amezitaka Kampuni zinazofanya urasimishaji kutoa elimu ya Upimaji kwa Wananchi ili kuepuka malalamiko yasiyo ya lazima kwa Wananchi.

Aidha amewapongeza Watumishi wa Idara ya Ardhi  kwa kufanya vizuri katika ukusanyaji wa mapato kwani mwamko wa ulipaji wa kodi ya Ardhi umekuwa mkubwa kwa Manispaa ya Kigamboni.

Zoezi la kusikiliza kero zinazohusu urasmishaji limeenda Sambamba na utoaji wa Hati Miliki ambapo jumla ya Hati 170 zilitolewa kwa Wananchi

Kamishna Msaidizi wa Ardhi kanda ya Dar es Salaam  akigawa Hati Miliki kwa Wananchi 

Mwananchi akiwasilisha kero zinazohusu urasmishaji katika Mtaa wa Mjimwema, Magogoni, Ungindoni, na Maweni.