Wananchi Manispaa ya Kigamboni watakiwa kuwekeza katika ufugaji wa Samaki

Posted on: January 6th, 2021

Naibu waziri wa Mifugo na Uvuvi Mheshimiwa Pauline Gekul  amewataka Wananchi wa Manispaa ya Kigamboni kujiajiri katika ufugaji wa Samaki ili kujipatia kipato na kukuza uchumi wa viwanda kupitia usindikaji.

Mheshimiwa Gekul ametoa wito huo katika ziara yake aliyoifanya leo ndani ya Manispaa ya Kigamboni ambapo alitembelea kiwanda cha utotoleshaji wa vifaranga vya samaki  na uuzaji wa Samaki cha Big Fish kilichopo kata ya Kibada ambapo alijionea shughuli mbalimbali za uzalishaji katika kiwanda hicho.

Aidha katika ziara hiyo Naibu Waziri ametoa wito kwa Manispaa ya Kigamboni kutumia fursa ya uzalishaji wa Samaki kwa kutenga bwawa moja la samaki ambalo litakabidhiwa kwa makundi maalumu ya kinamama, Vijana na Walemavu ikiwa ni njia ya kuwasaidia kujikwamua kiuchumi.

Sambamba na hilo ameahidi kutatua changamoto zinazowakabili wafugaji wa Samaki kwa kuziondoa kodi zote ambazo kero hususani katika uagizaji wa vifaa  na vyakula vya Samaki vinavyoagizwa kutoka nje ya nchi.

Mheshimiwa Naibu Waziri akitembelea mabwawa ya Samaki  katika kiwanda

Mheshimiwa Naibu Waziri akiwasili katika kiwanda cha Big fish Kata ya Kobada