Vikundi Manispaa. Ya Kigamboni vyapokea mikopo

Posted on: March 22nd, 2023

Manispaa ya kigamboni imetoa jumla ya Tsh. Mil 996.4  Mkopo wa  asilimia 10

Mkuu wa Wilaya Kigamboni Mh. Bulembo  amewataka wanufaika wa mkopo wa asilimia 10 unaotokana  na mapato ya ndani  kuzitumia fedha hizo kwa malengo kusudiwa ambao wameuanisha katika maombi ya mkopo waliowezeshwa.

Akizungumza wakati wa hafla ya utoaji wa mikopo iliyofanyika leo Machi 22,2023 katika viwanja vya ofisi ya manispaa kigamboni Katibu Tawala  bi Pendo Mahalu aliyemuwakilisha Mkuu wa Wilaya ametumia nafasi hiyo kumpongeza  Mkurugenzi Mtendaji kwa jitihada zake za dhati za usimamizi wa sheria inayowataka kutenga asilimia kumi ya fedha  zinazotokana na mapato ya ndani na kuzitoa kwa makundi nufaika ya vijana, wanawake na watu wenye ulemavu kwa mikopo isiyo na riba na yenye masharti nafuu.

‘Nikupongeze Mkurugenzi na wataalam wote ndani ya Manispaa hii kwa kuendelea kutenga fedha na kuzitoa kwa makundi kusudiwa, kitendo mkifanyacho ni cha kiungwana na mmekua sehemu ya kupiga vita umasikini kwa wananchi wa Manispaa hii’ alisema.

Veronica Kiluvia Afisa maendeleo ya Jamii aliyemuwakilisha Mkurugenzi Mtendaji alisema ni fahari kwao kuona wamekua sehemu ya kuinua maisha ya wananchi wanaoishi  kigamboni.

‘ Leo mmeweza kupatiwa fedha, mmewezeshwa  kwenda kutimiza malengo mliyojiwekea kama kikundi   niwaombe mkazitumie fedha hizi vizuri na mrejeshe kwa wakati ili kila mwananchi anayeishi ndani ya halmashauri hii iweze kumsaidia kupitia mikopo isiyo na riba na yenye masharti nafuu.

Akiendelea Bi kiluvia alibainisha pamoja na kuwepo kwa mafanikio zipo changamoto zinazosababishwa na wachache ambao wamekua wagumu kurejesha mikopo hiyo inayopelea kukwamisha wengine kuipata mikopo kwa wakati stahiki.

Aidha wanufaika wa mkopo bi Vaileth Rweyemamu na  Amiri Kawale wamemshukuru Rais wa Jamhuri ya Muungano wa Tanzania Mh. Samia Suluhu Hassan kwa kuwawezesha kupata mkopo na wameahidi kuirejesha kwa wakati ili kuwezesha wananchi wengine kunufaika.

Manispaa ya kigamboni imetoa jumla ya Tsh. Mil 996.4  ikiwa ni fedha ya asilimia 10 mapato ya ndani kwa  robo ya kwanza na ya pili kwa mwaka wa fedha 2022/2023.