Mkuu wa wilaya ahimiza ukusanyaji wa mapato ya ndani ili manispaa iweze kujitegemea

Posted on: September 28th, 2018

Kufuatia ukusanyaji mdogo wa mapato ndani ya Manispaa ya Kigamboni  Mkuu wa Wilaya ya Kigamboni Mhe. Sara Msafiri amelishauri baraza la madiwani  na wataalamu wa Manispaa  kujikita kwenye kubaini vyanzo  vipya vya mapato  ili kuwezesha manispaa  kutekeleza shughuli za maendeleo kwa kiwango kinachotakiwa  husuani katika kipindi hiki ambacho Serikali imejikita katika ukusanyaji wa mapato.

Mhe. Sara amesema  hayo leo alipokuwa kwenye kikao cha Baraza maalum la kupokea taarifa ya  fedha ya mwaka 2017/2018 lililofanyika kwenye ukumbi wa Kisota na kueleza kuwa kuwa, Manispaa  ikiwa na mapato shughuli za maendeleo zitakwama au kutekelezwa katika kiwango cha chini  kutokana na fedha kutotosheleza.

“Naomba tushirikiane Manispaa yetu haipo vizuri kwenye ukusanyaji wa mapato, Mkuu wa wilaya , Waheshimiwa madiwani  na wataalamu tushirikiane ikiwezekana tuunde timu ambayo itasimamia mambo ya uwekezaji pekee  hata kwa kushirikiana na wadau kutoka nje ya Manispaa  ambao ni wataalamu wa mambo ya uwekezaji” Alisema Mhe. Sara

Kwa upande wake Naibu Meya wa Manispaa ya Kigamboni Mhe.Amin Mzuri Sambo alisema kuwa  sasa imefika wakati Manispaa kuvuka viwango vya ukusanyaji mapato  kwasababu maeneo ya uwekezaji yapo ya kutosha na mengine yanahitaji uendelezwaji tu  hivyo ni kazi ya wataalamu kuandaa mipango mikakati  itakayotekelezwa ili  kuiwezesha Manispaa  isonge mbele.

Kaimu Mkurugenzi wa Manispaa ya Kigamboni Bw. Charles Lawiso  alisema kuwa  yeye pamoja na wataalamu wapo tayari kuhakikisha wanapanga mipango mikakati inayotekelezeka ili mapato yaweze kuongezeka na kuisaidia Manispaa kujiendesha hususani  shughuli za maendeleo.