Maadili ni silaha ya utumishi bora "DAS Kigamboni"

Posted on: November 24th, 2018

Ofisi ya Mkuu wa Wilaya ya Kigamboni leo imefanya semina ya mafunzo ya elimu ya maadili ya utumishi wa umma, uwajibikaji na mapambano dhidi ya Rushwa kwa watumishi wake kwa lengo la kuwakumbusha watumishi namna wanapaswa kuenenda lakini pia kuona wajibu waliokuwa nao kwenye mapambano dhidi ya rushwa.

 Akifungua semina hiyo kwa niaba ya Mkuu wa Wilaya ya Kigamboni ,katibu tawala wa wilaya Bi. Rahel Mhando amesema kuwa, ofisi ya mkuu wa Wilaya  imeona ni vyema kuwakumbusha watum...ishi wake kuhusiana na suala zima la maadili na rushwa hasa katika kipindi hiki cha uadilifu kazini ili wananchi waweze kupata huduma wanayotarajia.

 Akizungumzia mada ya Maadili mtoa mada kutoka chuo cha mwalimu nyerere Bw. Daniel Mafie amesema kuwa  maadili ni kinga ya kwanza dhidi ya rushwa na mambo mengine maovu ambapo alieleza kuwa maadili pia lazima yaanzie kwenye ngazi ya familia ili kupata viongozi bora.

 Aidha ameeleza pia maadili yoyote lazima yazingatie taaluma, uaminifu, na uwajibikaji na kueleza kuwa utumishi wa umma ni heshima hivyo  watumishi wanapaswa kutenda kazi kulingana na matarajio ya wananchi kwa kuzingatia kuwa Serikali kazi yake ni kutoa huduma kwa jamii.

 Kwa upande wake Afisa TAKUKURU upande wa dawati la elimu Bi.Nerry  Mwakyusa amesema kuwa anaipongeza ofisi ya mkuu wa Wilaya kwa uzalendo na kutenga muda wa kupata elimu juu ya mambo ya Rushwa na kuwaomba wengine kuiga mfano huu ili mapambano ya rushwa yaweze kufanikiwa.

 Aidha aliongeza kuwa  mapambano dhidi ya rushwa si ya Serikali au TAKUKURU pekee bali ni ya jamii nzima kwa kutambua kwamba rushwa inasababisha kero kubwa kwa Serikali na wananchi hususani katika harakati za kujiletea maendeleo.

 Aliongeza kuwa vitu vinavopolekea  rushwa kuendelea kuwepo ni ubinafsi na uroho wa mali, mmomonyoko wa maadili, kanuni na taratibu zinazotoa mlolongo mrefu wa upatikanaji wa huduma, utashi mdogo na mazoea mabaya ambayo watu wanayo juu ya rushwa ambapo haya yakiondoka itasaidia kwenye mapambano dhidi ya Rushwa.

 Vile vile alieleza kuwa iwapo watumishi wa umma watashiriki kikamilifu kupambana na rushwa ufanisi wa kazi na huduma za jamii utaboreshwa, wananchi watakua na imani na serikali,maendeleo ya nchi yataharakishwa, wawekezaji wengi watakuja kuwekeza na kuondoa vitendo vya uvunjifu wa haki za binadamu.

 Mkuu wa TAKUKURU Wilaya ya Kigamboni  Bw.Phillip Joseph amesema elimu ya rushwa inaendelea kutolewa na kuwataka watumishi waliopata elimu hiyo kuelimisha jamii na kwamba isiwe wao wakawa ndio chanzo cha kulalamikiwa  juu ya vitendo vya rushwa.

 Semina hii imefanyika kwenye ukumbi wa ofisi ya Kata ya Mjimwema na kuhudhuriwa na watumishi kutoka ofisi ya mkuu wa Wilaya na wawezeshaji kutoka TAKUKURU na Chuo cha Mwalimu Nyerere Kigamboni.

• Bw. Daniel Mafie kutoka chuo cha Mwalimu Nyerere akitoa Elimu ya Maadili kwa watumishi Wa umma

                     Elimu ya maadili ikitolewa

        Watumishi wakifatilia utolewaji Wa Elimu 

            Mkuu Wa TAKUKURU Wilaya ya Kigamboni Bw. Philip Joseph akizungumza kwenye mafunzo ya Rushwa na wajibu Wa watumishi Wa umma 

      Afisa Tawala Wilaya ya Kigamboni akishukuru wawezeshaji Wa Elimu na Katibu Tawala kwa Elimu waliyopata kama watumishi 

  Afisa TAKUKURU Wilaya ya Kigamboni (Dawati la elimu) Bi.Nerry  Mwakyusa akitoa Elimu kwa watumishi 

      Watumishi pamoja na watoa Elimu wakiwa kwenye picha ya pamoja