DC Bulembo awataka wananchi kutunza mazingira

Posted on: June 20th, 2023

Mkuu wa Wilaya kigamboni Mh. Halima Bulembo amemtaka Mkurugenzi Mtendaji kusimamia utekelezaji wa ujenzi wa Dampo la kisasa kuanza mara moja kama ilivyopangwa.

Hayo ameyasema leo Juni 21,2023  wakati akifunga ziara yake ya mtaa kwa mtaa katika mtaa wa Kigogo uliopo kata ya Kisarawe 2

DC Bulembo amesema Mkurugenzi Mtendaji kwa kushirikiana na Idara ya Mazingira hawana budi kuweka mpango mkakati wa kuwezesha ujenzi wa Dampo la kisasa ili kupunguza adha ya uchafu kwa wananchi wanaoishi karibu na eneo hilo.

"Maelekezo yangu kwa Mkurugenzi utekelezaji wa ujenzi wa Dampo la kisasa uanze haraka ili kupunguza Adha kwa wakazi wa eneo hili" Alisema.

Sambamba na hilo Mh Bulembo aliwataka wananchi kuacha tabia ya kutupa taka hovyo huku akiwasihi wataalam kutoka Idara ya mazingira kutembelea maeneo ya Dampo mara kwa mara kwa lengo la  kutoa elimu kwa wananchi juu ya namna bora ya utunzaji wa mazingira.

Sambamba na hilo DC Bulembo amepiga marufuku uchimbaji wa madini ya mchanga usiofuata  taratibu kwani ni kosa kisheria na yeyote atakaye bainika kukiuka katazo hilo  hatua kali zitachukuliwa dhidi yake.