DC Bulembo awaonya watendaji kata juu ya migogoro ya ardhi

Posted on: February 22nd, 2023

Mkuu wa wilaya Kigamboni Mh. Halima Bulembo leo Februari 23,2023 amekutana na Watendaji wa Kata zilizopo Manispaa ya kigamboni kwa lengo la kufahamiana sambamba na kupeana uzoefu kulingana na majukumu wanayoyatekeleza kwenye kata zao

Akizungumza wakati wa kikao Mh. Bulembo aliwataka Watendaji wa kata kushirikiana na watendaji wa mitaa ili kupunguza na kumaliza kabisa migogoro ya Ardhi ambayo imekua changamoto kubwa ndani ya Wilaya hiyo.

Sambamba na hilo Mh. Mkuu wa Wilaya aliwaonya watendaji kutojihusisha katika kuitengeneza migogoro ya ardhi ikiwemo kushiriki katika uaandaaji wa taarifa zinazopelekea mtu kupata hati ya umiliki wa eneo ili hali wanafahamu ubatili wa mauziano hayo.

Aidha Mh. Mkuu wa Wilaya aliwataka watumishi hao  kuwa daraja kati yao na wananchi katika kutekeleza miradi ya maendeleo inayoletewa fedha kutoka  Serikali kuu pamoja na miradi yote ambayo inatekelezwa kutokana na fedha za  mapato ya ndani.

Akijibu hoja iliyotolewa na Mtendaji Kata ya Pemba Mnazi David Basil ya kutaka kupatiwa mafunzo ya mara kwa mara juu ya usimamizi wa miradi na utawala bora. Mh. Bulembo ameahidi kulisimamia na kuwapatia fursa za kushiriki mafunzo hayo kadri ya upatakanaji wa fedha.