Wafanyabiashara Kigamboni watakiwa kupanga vizuri bidhaa xao

Posted on: November 25th, 2025

Mkuu wa Wilaya ya Kigamboni Mhe @dalmia amewataka wafanyabiashara wote ndani ya Manispaa ya Kigamboni kupanga bidhaa zao kwa kufuata utaratibu mzuri ili kuiweka Wilaya ya Kigamboni katika hali ya usafi na kuepuka magonjwa ya mlipuko yanaweza kuibuka kutokana na uchafu.

Mhe Dalmia ametoa agizo hilo leo Novemba 25. 2025 katika kikao chake na viongozi wa Taasisi za Serikali, viongozi wa makundi mbalimbali ya kijamii pamoja na wadau wa Mazingira kilichofanyika katika ukumbi wa Ofisi yake kwa lengo la kujadili maswala mbalimbali ya kiusalama pamoja na hali ya usafi wa mazingira.

Akizungunza katika kikao hicho amezitaka wakala wa barabara Tanzania (TANROAD) pamoja  na wakala wa barabara Mjini na vijijini (TARURA) Wilaya ya Kigamboni kuhakikisha wanafanyausafi kwenye barabara wanazozisimamia huku akiwataka kutekeleza majukumu yao kwa weledi.

Aidha amewataka viongozi wa makundi ya kijamii kama vile Bodadoda na Bajaji, Daladala, Machinga, Mama na Baba lishe  kuhakikisha wanaweka utaratibu mzuri wa kushughulikia changamoto za wanachama wao na sio kukimbilia Serikalini ili kutoa malalamiko.

Kikao hicho ni mfululizo wa ratiba ya  Mkuu wa Wilaya ya Kigamboni aliyoiweka ili kukutana na viongozi pamoja na makundi mbalimbali kwa lengo la kutoa maelekezo.