Wadau wa usafirishaji na wamiliki wa Mabasi watakiwa kuanza safari eneo la NAFCO Kata ya Somangila

Posted on: November 12th, 2024

Mkurugenzi wa Halmshauri ya Manispaa ya Kigamboni Ndugu Erasto Kiwale amewataka wadau wa usafirishaji na wamiliki wa Mabasi ya kwenda Mikoani waliopo Waliya ya Kigamboni kuanzia safari zao katika eneo la stendi ya NAFCO (Gezaulole) lililopo Kata ya Somangila ili wananchi waweze kupata huduma hiyo kwa urahisi.

Ndugu Erasto Kiwale ametoa wito huo leo Novemba 12. 2024 katika kikao chake na wadau wa usafirishaji wakiongozwa na viongozi wa Chama cha Wamiliki wa Mabasi Tanzania (TABOA) Wilaya ya Kigamboni kilichofanyika katika ukumbi wa Manispaa ya Kigamboni kwa lengo la kujadili namna ya kusogeza huduma ya usafiri kwa Wananchi.

"Tupo hapa kuongeza kasi ya maendeleo na kusogeza huduma kwa Wananchi kupitia Sekta ya usafirishaji." Alisema Ndugu Erasto Kiwale.

Aidha amesema Halmashauri ya Manispaa ya Kigamboni iko tayari kushirikiana na wadau wa usafirishaji na ameahidi kuziwasilisha changamoto zao kwa Taasisi zinazohusika ili huduma hiyo iendelee kuboreshwa kwa Muwekezaji na Mwananchi.

Naye mjumbe wa chama hicho Wilaya ya Kigamboni Bw. Herosinimi Lema ameomba tozo ya kivuko katika daraja la Mwalimu Nyerere iweze kupunguzwa kidogo ili waweze kuboresha na kuimarisha utoaji wa huduma Wilayani humo.