Mashirika yasiyo ya Kiserikali (NGO) yatakiwa kutekeleza majukumu yao kwa kufuata sheria

Posted on: June 2nd, 2023

• Mkuu wa Wilaya ya Kigamboni Mh. Halima  Bulembo ameyataka mashirika yasiyo ya kiserikali kutekeleza shughuli zao kwa kufuata sheria, kanuni na taratibu bila kuathiri tamaduni za jamii ya Tanzania.

Hayo ameyasema leo wakati wa ufunguzi  wa kikao cha wadau wa Mashiriki ya kiserikali ( NGO),Maafisa Maendeleo  ya Jamii na Ustawi wa Jamii kilichofanyika  katika ukumbi wa Ofisi ya Mkuu wa Wilaya Kigamboni.

Mh. Bulembo aliongeza kwa kusema yapo mashirika yanafanya vizuri katika kuisaidia jamii ila yapo baadhi ambayo yamekua chachu ya kuleta mmomonyoko wa maadili  unaopelekea kuleta sintofahamu ndani ya jamii.

Akiwasilisha taarifa ya utekelezaji Mkurugenzi Mtendaji wa Eden Garden foundation shirika linalosaidia wadada wanaojiuza  bi. Martha Minja  amesema mpaka kufikia mwezi Mei,2023 tayari wamefanikiwa kutoa elimu kwa walengwa 58 hasa wale wanaojiuza katika maeneo mbali mbali ndani ya Manispaa ya Kigamboni.

Bi. Minja aliendelea kwa kusema jumla ya walengwa 58 tayari wameshapatiwa huduma  ya ushauri wa namna ya kukabiliana na kuachana  kabisa na biashara ya kuuza mwili kwa kushirikiana na  idara ya ustawi wa jamii.

Wilaya ya Kigamboni kupitia  ofisi ya Mkurugenzi Manispaa imefanikiwa kusajili jumla ya mashirika  41 yasiyo ya kiserikali yanayofanya kazi na Halmashauri ya Wilaya.